唱k + 工展會
今日約左同事去尖沙咀CEO唱K, 去到後先知佢地去錯左地方, 咁佢地就即刻趕o黎, 我同男朋友就唱住先, 唱到第3首就到啦... 有Selina兩公婆, Suki+男朋友, 亞謀, 同埋我地兩個... 都幾開心呢~ 同佢地都幾好傾... 唱左3個鐘. 之後我地一齊去買六合彩, 一千六百萬呢... 第一次夾份買... 中左兩個字... ^_^ 買完之後, 佢地就齊齊去油麻地打麻雀, 我地就去工展會啦...
行返去隧道口搭102, 7點左右就到左啦... 我地拎住地圖周圍去搵印仔... 一路睇一路搵食, 又買左d特價野... 總之成袋都係食得架啦... 嘻嘻!!! 返到屋企俾媽咪話我做咩買咁多, 其實都唔係好多姐, 都少過上年, 可能只係佢地岩岩去完澳門又買左一大堆返o黎, 個櫃無位放姐... 哈哈!!!!
不過今日好似有人隻手臂好痕咁... 要打~~~ >.<
62
之前唔記得講, 旅行有62呀!!! 破唔到之前既紀錄... ^oo^
整notebook + 八卦學生
今日11點幾起身, 磅重... 去旅行食左咁多野都無重到呢... 仲keep到之前咁... 好野!!! 睇左新聞, 發覺台灣地震過後上唔到網... 唉... 又係boxing day地震.... 希望d人可以快d重組家園同埋忘掉傷痛啦...
睇左好多之前download既多啦A夢, 打左機, 又洗左衫...
夜晚男朋友o黎陪我, 因為屋企人聽日先返o黎. 所以今晚去左好耐好耐無食過既Mcdonald's度, 夠驚喜卦~~ 嘻嘻!!!
食完後就行返屋企, 點知o係名都度見到我果班個超級八卦學生... 佢同佢亞妹(都係學生)同埋佢細佬一齊... 係咁o係度奸笑, 又話晒俾佢屋企人聽... 激死... 真係八卦得可憐... 哼!!!
返到屋企就要開始執返部notebook呢... 仲有desktop... 整左好多... 佢仲教左我點樣幫部機backup, 我仲學左ghost... 不過唔係好記得...
睇埋賭場風雲, 再整多陣電腦就走啦... 嗚嗚... 唔想...
碧桂園長隆之旅 第三日
今日我地早起身, 因為我地買左12:40既車票走啦.. 所以9:30就起左身, 呢幾日我地一齊起身刷牙洗面, 好正呢~~ 梳洗完畢我地就去左會所食西式早餐, 多士腸仔煎雙蛋, 好味!! 會所邊有個好大既泳池, 如果我可以o係度游水就好啦~
食完早餐, 我地就返屋企樓下玩電單車啦, 架電單車撻到啦!!! 不過我唔敢drive, 因為我好耐無踏過單車, 驚平衡唔到.. 男朋友同auntie就o係度玩.. 我就坐o係男朋友後面, d風迎面吹過o黎真係幾正!! 雖然唔算好快, 不過我都驚兩個人重得滯平衡有困難, 所以只好抱住膊頭, sweet~~ 如果你係郭富城... 咁我係咪熊黛林呀?! 哈哈!!!
不過亞姨成日叫Sunny叫我"姨姨"呢.. 有無攪錯呀.. 點睇都唔似啦!!! 哼哼!!! 無理由的... 嗚嗚...
玩完之後就上返樓睇電視, 咁岩做緊"多啦A夢之夢幻三劍俠", 睇左一陣, auntie都話好睇呢.. 12:15, 我地就拎野走啦.. o係車站等車, 同Sunny玩左一陣, 呢個小朋友.. 3歲半, 都係頑皮左d, 應該係被寵壞呢.. 不過個樣好得意同埋識講好多野tum到人地開心呢~~
上左車, 我地又見到"交警二中隊", 又令我唸起"keroro第二小隊, kero kero kero..." 哈哈.. 好似..今次過關仲快, 無理由架, 今日係假期既最後一日, 都咁少人既.. 可能仲係早啦.. 過完關就搭的士返屋企. 都係3點鐘度.. 唸住去食tea的, 不過auntie最後決定今晚去食金田壽司, 所以都係唔食tea啦.. 咁我地就睏一陣覺, 又影左d多啦美同埋龜龜相... 影得好似爸爸咁呢... 哈哈!!! 又睇左一陣電視, 原來o係放學ICU果套卡通片都幾好睇架... 幾得意, 叫做"我們這一家"... 嘻嘻!!! 我們... 這一家... 呵呵!!! 仲有, 男朋友竟然仲同我講... 去旅行既前一晚auntie問我點, 係咪o黎佢度睏一晚... Kee Kee...
睏到5:30左右就揸車出去金田, 不過有人講笑.. 果刻, 我真係覺得好唐突你會咁講, 因為.. 我係唔會用呢d字o黎講笑的.. anyway, 算啦. 去到後, 原來金田開6:00, 所以要o係門口等一陣. 我地點左4人餐, 不過麻麻地, 有d魚我地都唔係好鐘意食.. 下次都係散叫好d.. 我食左唔係好多.. 都無食到壽司飯.. d手打烏冬幾好味.. 好過拉面.. 食完7:30就返屋企啦. 睇埋賭場風雲就返屋企啦... 不過, 臨走時... 竟然... 唔記得左... 要拎返d野... 仲... 俾人發現左... =.=" 俾人笑... >.< 不過好彩咋... 如果唔係都唔知幾時先可以拎得返...
坐車時, 無唸到你竟然問我.. 想夏天定冬天.. ~^.^~ 唔知點答好..
媽咪同老豆去左澳門, 所以等返我一個人呢.. ~_~"
今次3天既碧桂園長隆之旅, 都算好開心呢~ 不過可能無咩二人世界既時間, 所以唔算好唔捨得呢~ ^_^ 無眼濕濕到呢!!! 口喜口喜...
碧桂園長隆之旅 第二日
今朝10:30起身, 我地去左碧桂園既會所飲早茶, 個茶樓電視仲做緊"多啦A夢時光機"呢.. 不過d野食唔係太好食的.. 都係一般既點心, 最得意既就係"娥姐粉果", 我問uncle係咩o黎的, 佢話"娥姐"既意思就係靚, "娥姐粉果"就即係靚粉果.. 咁都得~
食完之後就o係樓下個夾公仔機唸住夾個聖誕公仔俾Sunny, 點知3次都fail呢.. 其中兩次都夾中, 不過都係臨尾個夾fingfing下既時候跌走左lu..
食完我地就搭的士去我地今次旅程既重頭戲啦.. Yeah.. auntie同uncle都一齊去.. 就係長隆歡樂世界同埋大馬戲, 我地12點多就到啦. o係門口, 我地同auntie uncle影左相, 其實成個園都好多香港人, 聽到佢地講呢度大過香港迪士尼.. ^_^ 之後就買飛啦. $195包歡樂世界同大馬戲, 價錢都算ok啦~ 唔係好貴~
我地第一個玩既機動遊戲, 就係全日最驚險既"十環過山車".. 我地玩之前o係旁邊度影左相, 岩岩影到果個十環係點既樣, 都幾得意... 真係名不虛傳呢...
驚到傻.. 沖落去果d驚啦, 果十環都真係唔少野.. 我都無唸過咁樣十環法可以咁驚的.. 但係真係第一次玩機動遊戲個過山車係咁樣轉的.. 真係好正!!! 極力推介~~ 落o黎既時候真係有d頭暈暈呢.. 唔係好企得穩, 手手腳腳都仲震緊... 玩完之後搵返auntie uncle就繼續行啦. 我地第二個玩既係摩托過山車, 今次既分別係無岩岩咁驚, 而架車係電單車既樣o黎的.
auntie同uncle都有一齊玩啦.. 開頭我都有d擔心佢地驚.. 點知auntie一d都無嗌過, 而我就o係佢地後面嗌, 俾佢地聽到晒.. =.=" 醜死怪.. 我地坐左上去時仲影左相呢.. $28蚊, 影晒我地4個, 所以就買左呢~~ ^_^ 嘻嘻.. 玩完之後就沿途影下相咁. 之後行到去旋轉木馬, auntie同uncle都話咁大個人都無坐過木馬, 而uncle開頭話唔玩的, auntie就笑佢話係咪驚俾人睇到.. 哈哈.. 我地選中左坐邊隻木馬, 就跳上去啦, 又影左一堆相呢~ 個旋轉木馬轉緊既時候仲有泡泡吹出o黎的, 好童話feel.. 正!!! 玩完之後就去左開心樂園, 其實即係好似機鋪咁, auntie見到架騎馬機即刻好興奮咁要俾uncle睇, 哈哈.. 叫佢騎呢.. 之後見到"漂流", 好似好正, 點知暫停.. 無得玩.. 咁就去左隔離既"超級水戰"度睇, 即係之前"江山美人"做過果度, 我地無玩到呢, 因為真係會完全濕晒, 有雨衣都會濕呢.. 而且又唔想auntie uncle成日o係度等我地, 所以就o係旁邊既桌子度食我地既小食, 我地買左羊肉串, 日式剪餃, 汽水, 大腸仔同埋爆谷, 好味呢~~ 一路食, 一路睇人地好興奮咁射水, 原來旁邊果d水槍一入錢就係計時射水的, 而o係水池入面果架船上面既水槍, 係要自己泵水先有水射的.. 唔怪得之船上面既人會濕過旁邊既人好多啦... 不過玩親既人, 落返o黎既時候都係成身濕到淋的.. 我地食緊野既時候仲聽到有個岩岩玩完既小朋友o係度話"哇.. 真係殺人唔眨眼呀!!" 哈..
食完之後我地就繼續行啦, 又見到有個令人好興奮既遊戲, 就係"急流勇進", 呢個真係勁.. 我都未見過咁勁既水花呢.. 濺起既水, 真係好似海嘨咁呢.. 我地又係無玩到, 企o係旁邊睇既人都有濕到呢.. 哈哈!!! 差d避唔切呢.. 雖然個急流無任何咩彎轉, 只係上左去, 之後衝返落o黎.. 但係都令玩既人同睇既人都好興奮開心呢~
行到差唔多尾啦, 我地仲玩左個"飛天絲路", 其實即係空中韆鞦.. 飛得都幾快, 不過真係fing到有d頭暈.. ^_^ auntie同uncle幫我地影相, 不過飛得太快既原故, 所以影唔到呢..
玩完呢個之後, 我地睇到個"墨西哥草帽"遊戲果度, 地下濕左一大片.. 應該係有人嘔o黎呢.. 哈哈!!! 好彩我地無事姐!!! 行左一陣, 我地又坐左小型纜車, 影左少少相, 就差唔多時間啦...
之後5點多, 我地o係出口果度坐左一陣, 之後就唸住食飯, 食完就入場睇大馬戲啦. 去左"椰林餐廳"食飯, 好似酒樓咁, 叫左個2人餐同埋加左一碟, $125埋單.. 之後就行去隔離既大馬戲啦.. 已經有一堆人入左場霸左最前既座位, 我地只好坐邊一d既第3行, 都ok呢~ 我地先打左電話俾個接送既司機9:15 o黎接返我地返屋企, 仲抄低埋佢個車牌號碼呢, $55一程, "9Y648白色"~ 等緊既時候, auntie仲同隔離果個小姐傾計, 果個小姐話佢地報團的, $388, 有幾餐食, 不過佢都係住果d比較舊既酒店, 所以可以做到咁平呢... 我地之前淨係問長隆酒店, 都係幾貴的...
大馬戲開始啦.. 整體上都算ok, 不過可能因為我地之前睇過亞視既介紹, 知道佢入面既一d內容, 所以無咩大驚喜呢~ 果d人被邀請既人, 應該係"馬"o黎架啦.. 邊有可能呀~ 8:50完左, 我地就急住啦啦聲去toilet啦, 嘻嘻.. 由於好多人既關係, 驚走失.. auntie仲拖住我隻手呢.. ^3^..我地等架車o黎, 之後就返屋企啦.. 好累呢.. 我隻眼都已經差唔多合埋啦.. 亞姨煲左湯俾我地飲, 我都學到點煲呢.. 下次有機會試下先.. 仲食左d生果, 不過我個胃有dd唔舒服, auntie讓我沖涼先, 我好早就睏左啦.. 12:30, 男朋友仲唸住睇dvd, 點知都好早睏著左lu~ 好野!!
碧桂園長隆之旅 第一日
聖誕假開始左啦.. 今日開始同男朋友既屋企人一齊返大陸玩. 原先唸住去上次去過既樟木頭的. 但係原來男朋友既亞姨o係碧桂園有間屋, 係好近長隆的... 而我地原先唸住book長隆既package同團的, 但係都睇唔岩同埋full左d, 所以就放棄左, 點知而家又有得去長隆世界玩. 好開心呢~
我9:00去左同佢地飲茶, 之後就返屋企拎野坐的士去黃崗過關, 都唔係太多人, 都叫幾快架啦, 可能我地唔係第一日假期就去啦. 所以都無咩人潮. 好順利咁過左關, 11點左右, 就o係巴士站等亞姨啦, 亞姨同埋佢個孫仔一齊o黎呢, 個孫仔好得意, 一d都唔怕人的. 叫做Sunny. 12點左右, 我地就上車啦, 車程大約兩小時, 我都無睏到. 只係合埋眼休息下同埋傾下計聽下歌咁.
去到之後, 我地o係間屋度坐左一陣, 齊齊去toilet, 之後就出去食野啦, 我地去左"木偶餐廳"食tea, d雞翼好好味呢, sunny仲爭住要食雞翼呢.. 食完野, 就o係條街度行下, d商店都無樟木頭果度咁開發咁. 不過我見到有一間商店有一大排既"黑白豬"襟章, 好靚呢, 一蚊一個, 咁我就買晒成排.. $40.. 個sales仲話好少見人買晒成排的.. 男朋友仲話左俾亞姨同埋佢屋企人聽我係老師, 係用o黎送俾學生的.. ^_^ 之後auntie同uncle就入左去"名店城"度剪頭髮, 而我同男朋友就去沐足, 不過... 因為我條牛仔褲係貼身的, 所以整左好耐都整唔到個褲腳, 所以.. 無得沐啦.. 嗚嗚.. 眼光光咁睇住男朋友沐, 我只係o係度打日記o係玩具度, 途中仲俾人游說我唔沐足就按摩, 但係又要去樓下, 咁梗係唔按啦. 我feel到果個女人有d唔滿意. 咁都無辦法架, 我又唔係唔想, 但係你又要我去第二度按, 咁咪唔按囉. 不過果個女人既服務態度認真唔掂, 無生意做就想發老脾. 哼!!! 抵死~
等左一個鐘, 之後我地就走左去睇dvd, 麻麻地平, 買左少少. 之後知道auntie同uncle都已經剪完頭髮, 而auntie就去左整手甲, uncle就周圍行, 咁我地就為左等auntie, 就去左"巧玲"度食甜品.. 真係好平呢.. 1蚊10粒魚蛋, 3蚊1碗甜品, 雙皮奶.. 3個人食到好飽都係$23.. ^_^ 不過我地唔記得左6:00就食飯, 去左"桂園", 所以一d都食唔落呢.. 只係食左一隻蝦, 少少肉就算啦.. 不過我都唔知原來咁多人一齊食飯呢.. 係auntie同uncle以前既鄰居呢.. 見到男朋友個中年發福肚腩.. 好可愛呢.. Kee Kee.. 7:30就返屋企啦. 返到屋企, 我地就睇左一陣電視, 原來卡通片既大長今都幾好睇架.. 返去要搵下d forum先得.. 之後又落左樓同Sunny玩, 原本唸住玩drive電單車的(因為o係大陸drive電單車係唔使考牌的), 不過亞姨部電單車好耐無撻過, 撻極都撻唔著, 咁我就同Sunny o係度拖住手踏單車.. 見到Sunny咁開心, 我都好開心呢~
玩到累, 就返屋企睇"一公升眼淚", 不過, 竟然無播到個預告喎, 真係可惡.. 佢地都睏晒覺lu. 我就就o係廳度睇新聞倒數, 12:30左右, 我地都上床睏覺啦.
o係呢度, 周圍都好靜... 唔似屋企咁, 隔離左右都有d聲音... 所以行步路都要靜靜地, 講野...都要用手遮住個口... 如果唔係嘈醒佢地就唔好啦... 不過我睏唔著呢.. "Koo.. Koo..." =.="
