累 + 叮~~
禽晚去左飲, 今日有dd唔係幾開心呢~ 因為唸起禽日同事既行為, 我覺得都幾過份, 講真, 我mind囉! 我覺得大大方方係ok的, 但係其中一位同事既行為, 實在係令我好唔舒服! anyway, 我呻完就無野架啦~ 佢地不嬲都係咁的~
呢3日都係自己一個人做班主任, 好累... 今個星期, 捱足5日, 完全無休息過, 至少心境係無休息過... 今日6堂, 上到我把聲都沙晒... 放學都唔罰人了, 同左個學生傾左一陣計就走啦. 返屋企睏覺... 睇埋最後一集"阿笨與阿占", 唔係幾捨得呢~ 阿笨d動作真係好得意好可愛~
有件事前幾日唔記得講, 就係朝早換完衫出門口時發現唔見左圈圈... 搵左幾分鐘都唔見, 就無奈咁出門口返工, 媽咪幫我搬屋企d野搵都搵唔到... 之後我下午放工返屋企換衫時... 竟然... "叮~~"一聲... 久違了既圈圈應聲跌左落地下... 好彩咋... 即刻笑左出o黎... 我都唔知點解架... 無理由無感覺架... 真係奇怪~~ =P
婚宴...
今日好忙好忙... 第一堂升旗禮, 要set野, 第二至五堂都上足, 之後下午空堂就要出去喇沙書院度聽考評局seminar, 好累, 仲要今日著左"痛"鞋, 好累... 今朝有個同學小息時搵我, 問我partner班主任既英文名叫咩名... 原來佢聽到禽晚既收音機, 聽到把聲好似佢, 一男一女, 個男既講佢地拍左拖11年, 聽日就結婚啦... 我覺得好sweet呢~ 因為結婚前一日唔見得面, 所以就一齊打上去電台度, 好勁呢... 我問個學生佢地o係電台稱呼自己叫咩名時, 兩個名都岩呢... 哈哈... 我都已經係9成9肯定係呢... 不過我當然無講到partner既英文名俾學生聽啦, 但係最後佢都知道左呢~
夜晚去左同事既婚禮, o係樓梯上面行落o黎真係幾好feel... 不過我覺得即場搵律師現場證婚個感覺好似麻麻地, 仲要個律師講野好唔掂... 今日男朋友都有同朋友一齊o黎, 不過個朋友早走, 又唔通知聲... 得返男朋友一個o係第2桌度食... 咁我果桌同事又走左幾個... 佢地就叫我叫埋男朋友一齊過o黎坐... ^3^ 有人怕羞呢... ~^.^~
之後我地都早走, 走既時候同同事講拜拜, 再行過學生桌時同佢地拜拜... 佢地一開始都好正常咁講拜拜, 之後就"咦咦"聲... 哈哈!!! 都幾攪笑... 唔知聽日返學會點呢...
第一次同男朋友見證另一對識既情侶共諧連理... 嘻嘻!!!
唱k
今日10點多起左身, 打下機, 睇下報紙, 又改左一陣卷, 就出去同朋友唱k啦~ 唱左都幾多歌, 不過朋友唱果d有好多都唔識的~ 我都係唱左幾首新少少既歌, 之後都係唱舊歌呢~ ^_^ d壽司都幾好味幾抵呀~ 不過間房好凍呢...
唱完k就同朋友去搵O2 Atom既headphone, 不過無開, 之後再去左潮流特區度行, 上到一樓我隻眼都已經發光啦~~ 見到好多鍾意既野~~ 差d就想大出血架啦~~ 好彩忍住左呢~~ 哈哈!!! 之後又去睇左d錶同飾物, 就去搭火車返屋企lu~
夜晚好眼睏, 睇美女廚房差d睏著~~ 女王的教室就好好睇, 好緊張...
萬景峰 示示單位 + 無國界餐廳
今日既行程係: 首先去左奧海城既KFC度食下午茶, 用左$24 coupon, 食左雞件同雞翼, 仲有好味既葡撻同格格脆, 食完之後就去我地第二個景點, 就係
萬景峰示示單位~ 嘻嘻!!! 第一次睇樓成功左呢!!! Happy!!! 個女仔經紀仲稱呼我地呢~ 嘻嘻!!! 睇左一共5個單位, 600+尺, 800+尺, 1000+尺, 1300+尺, 仲有1600+尺... 600+尺果個好似比較合適d, 咁多個d裝修都好豪華, 個廚房同廁所都有LCD電視機的... 個房既設計都好靚, 直情係酒店既設計, 度度都係金呀, 玻璃呀, 鏡呀咁... 如果個露台真係望果幅相既景就好啦~ 淨係1300幾尺既單位先係望汀九橋果度咋~ 其實多數都係望入面既園林景~ 不過都幾靚, 下面又係好大個商場, 附近又有, 交通方面都叫做方便的, 不過一定唔只佢話既10分8分鐘囉~ 價錢方面, 我覺得都幾貴~ 600幾尺既$3264000, 如果要拎300幾萬出o黎, 我又唔會選荃灣區呢... ^_^ 再唸返300幾萬, 可以買到差唔多兩個600多尺粉嶺上水元朗既單位啦... :P
睇完示示單位就去左尖沙咀食麻酸樂無國界, 今次終於食得到啦~ 無俾到附近既日本料理引誘到~ 算幾平呢~ 50幾蚊一位, 又多野食, 個湯又好好味~ 大頭蝦都唔錯呢~ 原本唸住食完飯去Sogo行街的, 不過今日節目豐富, 所以Sogo coupon要再等下啦~ 嘻嘻!!!
今日打左兩次機, 都係打手指機, 不過第二間煙味都幾勁, 係咁咳咳~~ 之後就返屋企lu... 返屋企既途中, 有水汪汪的眼睛呢~ ^3^
