東莞 樟木頭 兩天之旅 + 第四個紀念日 之 誕生
屋企, 我返左o黎啦~~ ^_^14/04/2006:
一早10點起身, 之後就會合朋友一齊去佢屋企人o係東莞樟木頭既屋度玩啦... 搭緊車既時候都幾緊張, 因為未去過, 同埋有種好興奮既心情: 唔知呢兩日會點過呢... ^_^
會合左朋友同埋佢屋企人之後, 就搭的士去皇崗口岸, 再搭皇巴士去過關... 真係意料之外既快... 因為逢假期既第一日通常都會好多人返大陸玩, 但係原來經皇崗係咁快的... 我仲要係無得用e道過呢~ 過完晒關, 就搭車去我地既目的地啦, 好多人排隊呢... 其他常平果d就無人, d工作人員叫到喉都沙晒都無人o黎上車... 但係我地果度就好大條龍o係度排, 仲有d人等得唔耐煩呢... 原來呢d巴士都有d係偷雞的... 有d人貪快就上左, 不過其他人就話呢d巴士無保證的, 車左成車人去打劫都未定呢... 都幾恐怖~
上左車之後, 就o係車度休息啦, 一路聽歌, 一路睇風景咁~ 主要都係一d荒蕪既地, 無乜高樓大廈的... 搭左大約45分鐘, 就到左啦~~ 到左之後就搵地方食飯, 果時已經係下午一點啦... 我地搭左架"三正半山酒店"既接送車去左飲茶, 不過可能已經過左食飯時候, 間茶樓都開始執野咁, 不過我地叫都有野食的... d野食都唔差, 個水餃都好味呢~~ 好快就飲完, 之後就出左酒店既門口度睇風景, d風景真係好靚呢... o係個半山度望返落去下面, 好靚, 仲搵左朋友既屋企人幫我地影左d相呢... 嘻嘻... 順便等到架接送車, 咁就落返去山下面, 行左一陣街同埋商場, 仲去左超級大百佳度行, 我都未見過百佳咁多野買的... 又有電器, 又有咕o臣, 行左一陣, 之後決定買左兩盞滅蚊燈, 一盞係朋友屋企人, 一盞係我的... 好得意的, 個外形好似個企鵝公仔咁... 多謝朋友... 買完野之後再搭車去朋友屋企人間屋啦, 叫做"風景山莊", 等車既差唔多全部都係香港人呢...
坐左15分鐘左右, 就到左啦... ^_^ 時間已經係4點幾, 坐左一陣又睇左一陣電視, 又同朋友既屋企人一齊鋪床單, 之後入房睏左一陣啦, 嘻嘻... 張床都幾舒服呢... 呵呵... 休息左一陣, 6點左右就起程出去食飯啦... 今次去花園酒店既酒樓, 仲同埋差唔多10個朋友屋企人既朋友一齊食添... 唔好話, 真係驚的... 因為我無唸過朋友既屋企人會約埋朋友一齊食的... 有d擔心... 擔心... 不過都係自自然然的好, ^_^~ 朋友屋企人既朋友仲... 介紹左我呢... XX... 真係面都紅晒呢... ~^_^~ 傾左一陣計, d食物都幾好食, 每人除返都係40蚊, 都算ok, 話晒都係酒店既酒樓~
食完飯之後, 朋友屋企人就去打牌, 我同朋友就去行街街, 睇左好多碟碟, 又買左好多呢~~ 搵到好多想買既野... 嘻嘻... 好開心呢... 雖然條街又多人又多車, 但係條街都好似係我地既咁, o係香港既街道就一定唔可以咁啦... 嘻嘻~~ 行左好耐, 又去左"洗腳"... 都係我既第一次呢... o係我心目中, 我完全無唸過腳係要人地幫我洗的... 所以硬係好似覺得怪怪咁, 唔係幾自在, 同朋友入左去一間叫做"新都會沐足城", 個心仲係有d擔心, 唔知隻腳會點樣俾人地幫我洗呢... ~_~"
入到去等左一陣, 有兩個後生女入o黎, 兩個個樣都好殘下的... 之後就開始幫我地放水浸腳, 按摩背部, 手手, 同埋腳腳, 由於我唔係好習慣, 所以就成個人都好硬咁... 無放鬆到, 個小姐都叫我"found宋衣訂"... 之後我就放鬆左少少, 不過按緊既時候都覺得有dd痛, 按完之後都幾舒服, 之後就走啦... 話咁就已經11點幾啦... 咁我地就去左"彩芳"面包鋪買左兩個細細個蛋糕, 一個係古古力的, 一個係藍莓起司蛋糕, 甲埋都唔過10蚊, 好平呢... 之後仲去左7-11買熱浪薯片同蝦條, ^_^ 之後就坐o係車站邊等車返去啦... 返到去朋友既屋企人都未返, 所以就去左沖涼, 我都未試過咁樣沖涼法~~~ 哈... 不過就都有d幾驚險既事發生呢... 我都有d擔心呢... 好似唔係幾好咁... 不過好彩後尾都好似無咩野咁. -.-" 沖完涼, 朋友屋企人返左啦, 之後就一齊好似開餐咁~ 開左蛋糕食啦... 都幾好味呢, 甜甜地~ 又一路睇波, 一路食薯片~~ 哈~~ 好開心呢~~
睇左一陣, 就上床睏覺啦... 開著左買返o黎既公仔滅蚊燈, 好靚呢~ 不過... 睏唔著呢... 因為... 成晚都... ... 有d"雜音"呢... d... 蚊... 飛... 來... 飛... 去... 哈哈...
15/04/2006:
睏到10點半鐘起身, 因為朋友屋企人又約左d朋友一起飲茶呢... 都係去禽晚花園酒店既酒樓飲, d野食都好食呢... 不過好多人等位呢... 好彩我地唔使等, 出面d人起碼要等個幾鐘先有得食呢... 都係禽日既人, 所以今日就自然左好多... ^_^ 開心~~ 食完野, 我就同朋友去左行街街啦... 又去左睇碟碟, 又買左幾隻呢... 由於亞哥咁岩打左電話俾我叫我買手信俾佢... 咁我就買左兩套碟碟俾佢, "魔法小天使", 即係我地既"我係小忌廉"呢... ^_^ 仲買左媽咪之前想睇既卡通片呢~ 之後我地行呢度行過度, 去左打桌球呢... 都係我既第一次呢~ 打左個半鐘左右, 朋友教我打的~ 原來隻手好累的, 我做個姿勢做極都好似唔係好岩咁~ 支q唔定, 同埋我隻手又震呢... 所以都無咩邊次係打得中咁... 不過最後都有3分呢~~~ 嘻嘻!! 朋友仲話第一次打算唔錯呢~~ 呵呵... 打左咁耐都係50蚊... 比起香港既真係差得遠呢~~
篤完波波, 就去左食tea呢... 我地去左巴士站果間茶餐廳, d野都ok, 不過d單亂晒, 果d凍奶茶都要叫左5次, 野都已經食晒, 仲要自己出埋去叫多次先有得拎o黎飲... 食完下午茶, 就返去啦, 搭車既時候太多人, 無位坐呢... 企o係架好似小巴咁大既車度, 都幾驚, 又無咩柱俾我扶住, 仲要條路既其中一度係爛的... 都唔知點解大陸咁樣都得... 條路爛左成兩個月都未整好... 架車行到果度都真係要企穩d, 唔係拋下拋下成個人都拋跌左... 返到去, 朋友既屋企人話5點鐘去食飯, 但係我地岩岩先食完野... 所以就無同到佢地食呢~ o係間屋度休息左一陣, 又睏左一陣覺, 咁就執野走啦... 有d唔捨得呢... 雖然只係兩日既旅程, 但係都已經好好... 將d碟碟同燈燈執晒落個袋度, 就走啦... 6點幾去搭車, 7點多食飯, 今次食一d好似台灣既野食, 就係蔥酒餅, 牛肉面, 豆漿同埋煎餃... 個牛肉面好好味呢~~ 蔥酒餅都好味, 不過就凍左... 煎餃都ok~ ^_^ 之後就買車飛走啦... o係車度聽歌, 睇風景, 同埋傾計~~ 嘻嘻... 好開心呢...
第四個紀念日 - 2006年4月14日 誕生啦: 35~ 呵呵.....
兩日既行程就咁完左啦... 返到香港都差唔多10點呢~~ 不過今次經羅湖, 好多人呢... 只係假期既第二日之嘛, 都咁多人... 行左好耐呢... 不過... 都係開心的~~ 哇~~~~
好想大叫幾聲呢~~
posted by Mandy @ 11:59 PM
0 comments
