第二日陸運會 + 中秋節
今日第二日陸運會, 好彩今日無上次咁晒咁熱... 不過全日除左食飯果半個鐘同埋同同事傾左少少計外, 其他時間都無坐過, 全場o係度拍攝, 隻腳好累, 仲累過平時返學... 今日有大隊接力賽, 即係每個社同埋教職員+舊生, 每組30個人, 每人跑200米咁樣接力... 教職員隊上年第三, 今年終於都拎第一啦!!! 勁!!! 連舊同事辭左職都返o黎跑, d舊生要返學同返工都特登請假返o黎跑... 真係勁呀!!! 抵拎冠軍!!!3點幾放學, 之後返屋企, 坐左一陣, 就等男朋友放工同埋屋企人出街食飯lu~ 屋企人出去先, 咁我就o係屋企等, 去左馬馬安山金滿庭, o係新港城, 見到好多楊桃燈籠... 好想摘一個~~ 食左都幾多野, d前菜係蝦, 已經好好味了... 不過d蝦骨吉親d牙肉呢... 好痛... 之後有小籠包(好好味), 芝麻雞, 滿庭蝦(好辣), 擔擔面(好好味... 老豆食左好多...飽晒), 煎黃花魚(好味... 一人一條, 食晒成條... 正!), 雲吞(都幾好)... 6個人都食到好飽~ ^_^
食完有人提議去西貢食糖水, 因為老豆之前都話想帶媽咪去食架啦... 不過上次落雨所以無去到, 咁今次就一齊去啦... 去到西貢搵泊車, 之後就入左滿記食甜品, 我梗係選左我鍾意既芒果豆腐花啦~ 之後仲叫左榴槤班戟, 榴槤布丁, 兩樣都好鬼臭... 亞哥仲o係我面前係咁吹氣... 男朋友又o係我旁邊唉氣... 臭死啦... 得我同老豆成場o係度掩鼻... =.=" 仲叫左湯圓薑水, d薑水又係好難飲呢... =.=" 老豆又叫左烏卒卒湯圓, 男朋友又叫左鮮雜果西米撈, 有海底椰的... 都幾好味~~
食完糖水, 成家人一齊行左一陣西貢海邊, 都有幾多人o係度玩燈籠同埋行街, 都幾有氣氛呢~~ 行左一陣, 我地就買左蠟燭, 點著個燈籠行啦~ 嘻嘻!!
我以為呢d只可以o係細個既時候玩的... 點知而家咁大個人都有得咁玩... ^_^ 拎住個燈籠一路行, 一路笑, 又行過d海鮮鋪, 見到間鋪拎左d水魚出o黎o係地下俾人摸同影相, 的咁大個既小朋友都敢摸同埋拎住... 我....... 都係影相算啦... 行左一半, 就行返轉頭, 亞哥送老豆同媽咪返屋企, 我同男朋友就行多一陣先走~
我地買左成盒蠟燭, 梗係唔會就咁點左一枝o係個燈籠度就收手啦... 嘻嘻!! 我地去左碼頭, 睇左一陣海, 男朋友話望到個海邊好多魚仔... 咁我就行到好埋好埋先睇到dd似魚仔既野... 佢一路介紹佢去遊船河果時d船係點, d快艇又係點, 個wake board又係點, 仲有inboard同outboard... 雖然我無去過遊船河, 但係都聽得津津有味呢~ 好似真係好好玩咁... ^3^
行完碼頭傾左陣計, 又一路行去公園, 搵到一張桌, 果度又好多人都o係度玩蠟燭, 不過個個都有月餅罐或者報紙的... 有其中一桌就用燈籠摺埋既時候o係度墊住o係點, 咁我地又無月餅罐, 又無報紙, 咁岩我地只係點左一個燈籠, 仲有一個, 所以我地就用果個燈籠o黎墊住玩啦... 第一樣野要做既... 梗係砌個心心出o黎啦... 男朋友負責拎住枝點著火既蠟燭, o係度滴d熔左既蠟落個燈籠度, 咁我就負責放d蠟燭落去固定個位置, 用左10幾枝就砌好啦~~ 之後就係點火儀式... Yeah!!! 成功!!! 影左相, 有相為證, 有又大又圓既月亮為證... 我地o係二零零六年既八月十五既西貢公園度玩蠟燭砌心心~~ Kee Kee~~ 仲有人唸起一句說話: 「每逢佳節倍思x, 嘻嘻哈哈!!!」激死... 自創的... *3*
影完一輪相, 又睇多一陣, 就吹熄佢啦... ^_^ 好似吹生日蛋糕咁, 如果每年既生日都有生日蛋糕, 如果個生日蛋糕上面都砌左個咁既心心o係度, 就好啦~~ 當然, 唔知到時d蠟燭會唔會滴晒落個蛋糕度又另一回事啦~~ :P
之後我地就收拾左d野, 男朋友係都唔俾我留返果4枝未用既蠟燭, 佢話無位放, 我知道... 床頭櫃應該有位放的... 嘻嘻!!! d蠟燭又唔會放o係度自己著火既... ~_~" 最後都係放左o係垃圾桶旁邊睇下有無人要~
不過走既時候, 發現我唔見左學生送俾我既手繩呢... 係陸運會佢地幫我帶的... 走返去張桌度既時候都搵唔到, 應該都係之前行既時候唔見架啦... 算啦...
之後我地就慢慢行返車度, 經過公園既廁所, 門口有個小水池, 放左幾隻好大既"紙船", 真係好似的... 好得意~~ 時間岩岩到11:45, 即刻抬頭望, 天文台話呢個時刻係香港見到最大最圓既月亮, 即係"大月亮", 嘻嘻!!! 一齊望完, 就走啦~
今日玩得好累~ 不過好開心~ 又可以一家人一齊食飯, 又玩左好耐無玩既蠟燭, 又點左燈籠, 又行左海邊碼頭, 又影左相... ^_^ 係差一樣... 哈哈!!! 就係......... 中秋節唆哈!!! :P
坐車既時候, 差d睏著... 因為實在係太累啦~ 返到屋企換左衫, 睇左少少forum, 就上床睏啦~
今個中秋... 唔知用咩形容詞形容好. ~^.^~
posted by Mandy @ 12:05 AM
0 comments
