Our Lives

母親節快樂 + 買眼鏡 + 睇樓

今日母親節, 朝早好眼睏, 所以無早到起身同媽咪去飲茶呢... 11點幾起身, 繼續download, 活動左3個鐘左右, 兩點幾又睏過... 睏到5點... 夜晚同媽咪去福井食日本野, 我地一家人6點鐘出門口, 6點10分去到, 點知門口已經排左好多人o係度, 叫到B6, 我地係B40... 要等30幾個, 等緊果陣我地走左去萬寧睇野, 我見到$17.9有40包旺旺燒米餅, 好抵呢... 所以買左, 又見到上次飲痾我既西梅汁, 又買左... 再見到雪完美去痘無印精華素特價, 所以又買埋... ^_^ 返返去等位, 只係叫多左10幾個. total等左一個半鐘, 終於到我地啦... 我地叫左好多野食, 有火焰三文魚壽司, 火焰鰻魚壽司, 三文魚壽司, 加州卷, 芝麻鰻魚反卷, 芝士唔知咩餃子, 泡菜牛仔骨石頭飯, 滑蛋雞肉飯, 羊骨架, 沙津蟹薯餅, 好好味... 最後個滑蛋飯食唔晒, 除左老豆之外, 個個都好飽, 我就打包聽日既lunch食... ^_^ 埋單都係400有找... 抵~
食完之後坐車去左上水廣場A LOOK同媽咪買眼鏡, 睇睇下我又睇中左一款, 都幾靚的.. 不過我猶豫左好耐, 因為我都唔係成日帶眼鏡的... 只係要睇遠野先帶... 但係唸唸下, 副眼鏡都唔係好貴, 因為第二副有7折... 折實都係$257.6... 真係好平... 所以後尾都俾人tum tum下就買左... 入去驗眼... d近視好似輕左呢... 左眼150, 右眼225... 加散光25... 我記得第一次當年會考買果副好似都有275架... 個驗眼師話我可能keep得好... 都唔知係咪真的... 我時帶時唔帶, 應該都唔關事的... 最後我都係俾左$200亞哥... 嘻嘻... 好野!! ^_^ 買完眼鏡就去左亞哥既御皇庭, 因為我想睇下個游泳池係點架呢... 坐緊車果陣, 聽到商業電台第一台播緊"後來"既日文版, 好好聽, 我錄左音呢~~ 之後又訪問范徐麗泰既片段, 我都幾贊同佢講既野... 佢話兩公婆有兩樣野好重要, 第一: 感情既忠誠, 第二: 兩公婆無計的. 佢話佢同佢老公係一齊入錢落同一個戶口的, 唔夠錢既咪大家一齊唸掂佢, 無私己錢的... 試問有幾多對兩公婆係做得到既呢... 不過我feel到以前佢地兩公婆真係好溫馨同和諧, 應該都係令人羨慕既一對呢~ 去到御皇庭, 個泳池關左門, 所以一入到去就去左會所睇... 會所都幾靚呢... 有地方沖涼, 有風筒有cream, 又有定型gel, 又有小Sauna室, 我開過門睇, 仲熱的~~ 之後就去左健身室睇, 唔係好大, 有10多部器材, 我就部部都上去玩下... 好玩呢~~ 一定要o黎... 之後就上左去亞哥間屋... o係露台望住個泳池... 好正呀... 我要去游水呀... 好鍾意呢... 亞哥同媽咪見我咁鍾意... 就講... 叫朋友上o黎睇下啦... xxx萬就賣啦... =.=" 不過我要快d整左張個人八達通先... 之後就整業主證... 之後... 嘻嘻... 我就可以o黎做gym同埋游水玩sauna啦... 呵呵... 減肥有望啦... Kee... Kee... 傻笑中~~~~
睇完都10點幾啦... 返屋企... 一返到屋企就打電話同朋友分享呢~~ 我地多左兩個節日呢~~ 不過俾朋友搶先一步定左個日期呀~~~ 嗚嗚~~~

posted by Mandy @ 12:35 AM