工作13小時
今日係對3a既last day, 派成績表, 收通告, 結業禮, 訓勉, 影相, 嘻嘻哈哈. 班女同學仲想搵我同佢地唱k. 因為我班有一個學生會飛紐西蘭讀書, 所以最後我地將果支"整潔比賽第一階段季軍"既錦旗簽晒名送俾果位學生. 最後又影左大合照先走. 我禽晚仲買左份禮物俾男班長, 因為佢全班第一名, 同埋下學期比上學期總平均分進步左10分... 不過估唔到一樣野, 就係最後臨走時, 竟然有個o係開學既時候同我地兩個班主任嗌到水火不相容既同學大聲講"我地全班可唔可以俾一d熱烈d既掌聲俾我地兩位既班主任呀", 之後個個都話好, 之後佢地就拍手... 我同partner就咁接受左佢地既掌聲, 果刻有dd感動, 真係感動... 不過有幾個學生真係黑人憎, 最尾果日仲咁衰格. 聽日註冊佢就知味道!中午全校老師職員去晒酒樓食飯. d菜又係麻麻地, 食左唔係好多. 胃口麻麻. 同事話我塊面好似又敏感呢.. ~_~ 唔開心.. 都唔知點解咁的. 我細個無d咁既問題架. 唔通又係我新買果d塗面既膏.. 停佢一陣唔用先.. ~_~
食完已經2點幾. 返學校唸住執桌面, 點知之後去左訓導處同同事o係度寫program... 鬥快o係度寫, 佢用delphi, 我用vba... 雖然最後我地都決定唔用個program, 雖然我地放左好多時間落去dup個program出o黎, 但係今次果然令我回憶起好多以前寫vb既function... 發覺其實寫program都幾好玩... given that係有時間同閒情逸緻既話...
攪到5點半, 就差唔多落禮堂set野, 因為今晚係"家長教師會周年晚會", 電腦呀, projector呀果d... d到會既野食麻麻地, 一個二個都已經食左一兩轉野食既時候, 我先岩岩執完d咪呀, 電腦呀, 先開始拎野食... 唉... 胃口麻麻, 心情更加麻麻... 中間有個頒獎, 係家長多謝d老師的, 點知原來搵左每個room既福利官上台代拎... -.-" 完全無唸過要上台... 抽獎環節, 抽左差唔多成90份獎品都無我份.. 嗚嗚.. 我都知自己無抽獎運架啦, 但係唔使咁呀... 我側邊d人都有... 係我無... 心情再麻麻... 不過我發現左樣野, 有某一d人真係好有抽獎運的, 好似次次都有佢份咁.. 真係勁~ ^_^
個function 9點左右完, 又要執野... 個個都已經走晒, 執完之後上返個room, 我好肯定, 全層3樓係得返我一個人o係度, 突然間有種說不出的孤單感, 寂寞感... 突然好想個天落一場大雨...
原本唸住今晚既時間可以開開心心, 不過...... 算啦...
posted by Mandy @ 10:42 PM
0 Comments:
Post a Comment
<< Home