Our Lives

罵人 + 7B畢業晚宴

今日中午點名時, 忍唔住罵左人, 平時分已經出左, 全班40人有22人係唔合格的, 呢個只係平時分, 即係平時d小測驗, 功課同埋上堂表現, 有d甚至0分都有.. 真係離晒譜! 咁多科甲埋個平時分既平均分, 全班最低竟然係17.7分, 即係可以話差唔多咁耐以o黎都無做過功課咁.. 稍為有做都唔會得咁低. 原本唸住好聲好氣同佢地傾, 勸佢地, 點知有d人仲要o係度嘈, 有d人隻手就做緊自己野.. 真係火都o黎埋!! 罵到連下一堂既老師o黎左好耐我都唔知呢... 哼!!
今晚去7B既畢業晚宴, o係新世界萬麗酒店, 聽日係5B-E, 又係o係新世界萬麗酒店攪, 不過我之前報左個course又係聽日, 所以可能去唔到.. 雖然個course係好有用, 係講點樣set up一個virtual pc network, 可以o係教networking既時候俾學生玩, 不過咁夜.. 18:45-21:45, 攪到我去既意欲都下降左~~
禽晚d波波唔聽話.. 突尼西亞竟然輸左.. 之後最尾先追到2-2, 哼!! 衰人..
夜晚11點9返到屋企, 去完7B既畢業晚宴, 本場刊都整得幾有心機呢.. 入面講d野都幾深刻, d野食都ok, 生蠔都ok, 不過好似?左d.. d雞翼好好食, 我食左5隻, d意粉都ok, 食野之前果個入兩個門口既熱身運動真係幾有意義, 你地唸到真係好叻~ ^_^ 食左一輪野之後, 俾d學生屈唱歌... 唱左首"這分鐘更愛你", 唱左兩句, 同事話我入錯行呢... 其他同事都讚我呢... 嘻嘻... 不過開頭真係幾驚, o係學生面前講書就成日都係, 不過唱歌都真係第一次... ^_^ 之後又玩左兩個game, 個大電視game我都估中左幾個架! 哈哈.. 之後有個video睇, 又有兩個同學致辭, 我聽到都有d感動, 有dd眼濕濕呢.. 尤其係聽到我關於我自己果段同埋我好尊敬既老師果段, 我相信佢今日一定都聽到你地呢番說話的!
影左大合照, 又同幾個同學影左一陣相, 10點9, 就走啦, 返屋企睇波波.. 皇室嘻嘻士多啤梨倒掛金勾, Yeah!!

posted by Mandy @ 11:59 PM