Our Lives

潘主任, 唔捨得你呀!

今日係結業禮, 又係歡送潘主任, 仲係家長教師會聚餐既日子. 朝日參加結業禮既時候, 校長講野既時候, 臨尾竟然同學生講左潘主任要走, 我都有少少意外, 佢宣佈潘主任o係學校服務左34年, d學生拍晒手掌, 拍左好耐都唔停. 好正!! 佢地拍手掌係真心多謝潘主任的, 果刻都幾感動!! 人生有幾多個34年.. 之後校長都同學生講左幾件潘主任既事俾學生聽, 真係覺得潘主任好好!!

小息完左之後就要去派成績表, 之後我要帶一堆學生去打電話, 因為之前果日發生左一件唔好既事, 攪到我打左10幾個電話講左10幾次一樣既說話, 激死我啦! 之後就啦啦聲入去禮堂參加歡送潘主任既聚餐, 校長都有上台講野, 都講得幾感動呢, 校長仲稱潘主任做潘校長添!!! 原來我地有12個教職員係以前心誠既學生呢, 勁呀! 呢12個就可以有機會上台向潘主任顯唱"恩典太美麗", 當然包括我啦. 之後王指揮親自作左首歌送俾潘主任, 首歌真係好好好感動, 一開始係心誠校歌既旋律, 已經好有喊既衝動, 因為校歌對於潘主任o黎講, 真係好有代表性, 好有意義, 之後成首歌既中段同尾段都係"友誼萬歲", 真係好好feel呢, 個心硬住硬住, 都有流左少少眼淚, 一o黎係首歌好岩個感覺, 二o黎係管弦樂團既同學表演得好有感情! 好想再聽一次! 之後有楊sir既分享, 最好笑就係佢話, 好懷念潘主任每日放學後既特別報告, 佢話報左10年每日都仲有特別報告! 哈!

之後就食野啦, 我地都有去潘主任度敬"酒", 同埋黃生(圖書館的, 佢都係退休呢), 之後佢地都有o黎返我地度回"酒"呢!! ^_^ 差唔多食到3點呀! 之後就同校園電視台既同事開會, 真係好激氣, 你同我都係負責老師姐, 點解好似唔關你事咁既?! 得我o係度講野, 我未hold過會架嘛, 都唔幫下手, 等我講到都唔知似咩咁. 之後又唔幫手做野, 豈有此理!! 果時係好唔開心呀, 開頭又話唔好攪到咁大, 咁我咪cut左d野囉, 而家講下講下又話都真係幾大下, 咁你究竟想點姐?!! 又係你地叫cut野, cut完之後又加加加!!! 好大壓力呀! 開到5點, 之後就返room執野, 執返學生d簿. 執左一陣就要落去hall啦, 家長教師會聚餐, 開始時幫miss sung set少少野, 之後就唱歌講野, 之後就食野啦, d野好難食呢.... 食到8:45左右, 攪到我半夜好肚餓呀!! 返到屋企沖涼睇報紙, 之後睇完醫道就睏覺啦, 累死我啦!!

posted by Mandy @ 11:59 PM